گونشلی

سوئیله ای گول، هانسی باغین، سن گولِ رعناسی‌سان؟

هانسی گلزارِ بهشتین، سروی سن، طوُباسی‌سان؟

آچما زولفون عطریله بیهوش ائدرسن عالمی

چونكی سن دشتِ خطانین، عنبرِ ساراسی‌سان

نازنین جانان گؤزه‌للر، قارشی دُورماز روُیینه

جمله سیندن سن گؤزه‌ل‌سن، هامی‌نین اعلاسی‌سان

باغبانین كیملر اولموش؟ گؤزلرین حئیرانی‌یام

سن مگر گلزارِ حُسنون نرگس شهلاسی‌سان؟

گؤرمه‌یینجه گول اوزون، جسمیمده قالماز طاقتیم

روحی‌سان گویا، بو مسكین عاشیقین، اعضاسی‌سان

من كیمی مینلرجه مجنونلار، اسیروندیر سنین

سؤیله یاریم، دوغرو سؤیله، سن كیمین لیلاسی‌سان

اینجیمه‌ز، «واحد»، او گول آه و فغانیندان سنین

سن گؤزه‌للر باغی‌نین بیر بولبولِ شیداسی‌سان

شعر: علی آقا واحد

عشقین ائله‌سه عالمی قان، بیلمه‌یه جكسن!

یوز دفعه دئسه‌م، مطلبی قان، بیلمه‌یه جكسن!

باخ سینه مه، مین یاره ووروب تیرِ نگاهین

افسوس كی، ای قاشی كمان، بیلمه‌یه جكسن

آخر كی قوجالتدی منی، درِد و غم عشقین

پیر اولماسان، ای تازه جوان، بیلمه‌یه جكسن

بی‌مهرسن، عالمده، رُخِ آلینا حسرت

وئرسه‌م‌ده اگر هیجرده جان، بیلمه‌یه جكسن

مجنون كیمی، زنجیرِ سرِ زولفینه باغلی

اولسام داخی، رسوای جهان، بیلمه‌یه جكسن

توتسام، گؤزه‌لیم، دامنینی، اینجیمه منده‌ن

نیلیم كی، دئسم گئتمه، دایان، بیلمه‌یه جكسن

كویوندا گؤزوم یاشینی، یوز یول ستمیندن

ائتسه‌م یوزه، ای سرو روان، بیلمه‌یه جكسن

سرّ لبینی دیلده نهان ساخلادیم ائلدن

فاش اولمایا، بو رازِ نهان، بیلمه‌یه جكسن

شؤق دهنین «واحدی» محو ائیله‌سه هر گاه

اوندان یئنه بیر نام نشان، بیلمه‌یه جكسن

شاعیر: علی آقا واحد