« كاش اولاردی »
یازار : amirreza | بؤلوم : تورك شعری
+0 به یه ن
كاش اولاردی كی یئنه زولفونه من شانه چكردیم
سنی بیر شمع اُوزومی آتشه پروانه چكردیم
كاشكی مجنون ئورگیمه یئنه لیلا تك اولاردین
تا كی من عشقیده اُوز شكلیمی دیوانه چكردیم
كاش اولاردی كی یئنه ده او كئچن گونلریمیز تك
سنه خاطیر گوزلیم عالمی من قانه چكردیم
كاشكی دونیا قاییداردی ، دئدییم سؤز یوخ اولاردی
تا كی ذهنینده كی اُوز رسمیمی مردانه چكردیم
كاش اولاردی كی یئنه ده آیریلیق عمرو بیتردی
گله جك ده بو قارانلیق گونه افسانه چكردیم
كاشكی جانا قاییداردین منی سن عفو ائلییردین
قویمازییدین اُوزومی من سنه بیگانه چكردیم
« وحید شكرزاده »
ایتیردیم
یازار : amirreza | بؤلوم : تورك شعری
+0 به یه ن
آغلامادیم یوخلوغونا
فیكریم، داش دیمیش پنجره شوشه سی...
نه گونشی شاهید چاغیردیم نه اولدوزلاری
بو چیلپاق حقیقتی گورمك اوچون
گئجه لر سنی یوخومدا گوردوم،
بالینجیمی دا چئویرمه دیم
یوخونا گیرمك اوچون،
دئمیرم ناغیل قدر اوزاقسان
ابدیلیك بیر گئجه نین ساكنیم
دئمیرم بو گوركمده
گئجه واختی فانارلاری سیندیریلمیش آوتوموبیل كیمییم.
بئله اولسا نه واردی
گوزلریم اولماسادا
اللریم سنی تاپاردی.
یوللاری بیر یوماق كندیركیمی
ییغاردیم اللریمه
داغیداردیم قاتارلارین سیراسینی،
چاتاردیم اللرینین حسرتینه.
ائله سنی آختارماق اولاردی پئشم
گوزلریمدن سو چیلردیم یوللارا
بیر نغمه ده اوخویاردیم:
"كوچه لره سو سپمیشم"
دئمیرم ، سنسیزلیك یوللاری كسیب.
یوخ!
بیر باخ گوزلریمه
بیرجه كلمه سوز یازیلیب:
"تاسوف!"
*نصرت كسمنلی *
« آغلاییرسان ساغلیغیمدا آغلا سن »
یازار : amirreza | بؤلوم : تورك شعری
+0 به یه ن
گؤز یاشینی تؤك سینه مه دفن ائله
آغلاییرسان ساغلیغیمدا آغلا سن
قهرین وارسا ، ساغلیغیمدا قهر ائله
آغلاییرسان ساغلیغیمدا آغلا سن
وارمی ایندی آهدان یانان كرملر ؟
اودو اودلا سؤندوره جك صنم لر ؟
بیرده چتین اله دوشه بو دملر
آغلاییرسان ساغلیغیمدا آغلا سن
گئده ن گئده ر غمی قالار بیر ایچیم
فرقی یوخدور ، یا اوچ مینی ، یا اوچو
مزار اوسته چوخو آغلار گؤرك اوچون
آغلاییرسان ساغلیغیمدا آغلا سن
قورخ كی صاباح قبیرلرده چاپیلا
اینجیله شن گؤز یاشلاری قاپیلا
گؤز یاشلارین آل وئرجیسی تاپیلا
آغلاییرسان ساغلیغیمدا آغلا سن
اؤلوم اودور باشدا اوتورت ، باش اولمور
ساغلیق اودور تعریفلره آش اولمور
داشادا بوك ، داشی دا بوك داش اولمور
آغلییرسان ساغلیغیمدا آغلا سن
« ممد آراز»
«اشعار هوشنگ جعفری زنگانلی»
یازار : amirreza | بؤلوم : تورك شعری
+0 به یه ن
باخدیم دالیسیجا یار گئدنده
بیر یولدا دئدیم باخار گئدنده
باخدی قاپیدان كئچنده گولدو
بیلمیردی اوره ك اومار گئدنده
باغلاندی دیلیم اوره كده ن آمما
آز قالدی چئكم هاوار گئدنده
گئتمه گئدیسن ؟ یاواش – یاواش گئت
جانیم بیلی سن چیخار گئدنده
دؤندر گؤزونو خومار – خومار باخ
قویما منی ده ، خومار گئدنده
سن سیزلیگه دوزمه گیم چتیندی
گل جانیمی آل قوتار گئدنده
سندن سورا عشقی نئیلیرم من
آل عشقینی ده آپار گئدنده
مئهر ائیله نوازش ائیله بلكه
گول بیتسین اورك ده قان گئدنده
من گؤر نه دئییردیم اؤز اؤزومنه ن
قول بوینوما بیر سالار گئدنده
بیچاره اوره ك بولود كیمین دیر
گؤردوكجه سنی دولار گئدنده
دای « جعفری » بسدی سیزلاما چوخ
سؤز اوستادی شهریار گئدنده
ایراندا هونر دیلنچی لیك دیر
باخما كی تاپار ویقار گئدنده
«اشعار هوشنگ جعفری زنگانلی»
** آتا اوجاغی **
یازار : amirreza | بؤلوم : تورك شعری
+0 به یه ن
دئییرلر قیزلارین گؤزو آج اولار
آتا وئردیغی پای باشا تاج اولار
آتا اوجاغینا گئتدیغی زامان
غنیمت بیلیرم بیر ایچیم سویو
غنیمت بیلیرم بیر ایچیم پایی
قووشار كؤنلومون هارایی هایی
آتا اوجاغینا گئتدیغیم زامان
آنام قوجاقلییار باغی باغچانی
دولدورار خورجونو ییغار بوخچانی
سوروشماز آ بالا به سنین هدیه ن هانی؟
آتا اوجاغینا گئتدیغیم زامان
ائویم سارای اولسا خانمان اولسا
پولوم خزل اولسا سیل سامان اولسا
قوپاریب گتیررم بیر گومان اولسا
آتا اوجاغینا گئتدیغیم زامان
تویوق یومورتدویار پیشیك ده گوله ر
ایت ده ناز ائیله یهر كئشیك ده گوله ر
آی قاپی دا باجا دا ائشیك ده گوله ر
آتا اوجاغینا گئتدیغیم زامان
نه قاتیق قویارام نه سود قویارام
نه تیكه قویارام نه ات قویارام
آتامی آنامی لاپ مات قویارام
آتا اوجاغینا گئتدیغیم زامان
یاناغیم آل لانار اوزوم ده دویماز
شعریم ده نغمه م ده سؤزوم ده دویماز
آی « نازیله » نئینیم گؤزوم ده دویماز
آتا اوجاغینا گئتدیغیم زامان
**نازله صفرلی **