گونشلی

نه چیچك وئرمه یه بیر كسیمیز وار

نه بیر كیمسه میز وار چیچك اومماغا ...

درسم گول لرینی بو گلن یازین

ساللانیب یئلله نسم بوداق لاریندان

ائشیتسم آدیمی سئون بیر قیزین

هله اؤپولمه میش دوداق لاریندان

بو یاز گیجه سینده اؤلمه یه نه وار؟!

شاعیر: رامیز روشن

آرادان نه قدر ایل كئچیب گؤرن

تانییا بیلمدیم ، منی باغیشلا،

من ائله بیلیردیم ، سنسیز اؤله رم ،

من سنسیز اؤلمه دیم ، منی باغیشلا !

« اؤلمه دیم » دییرم ، نه بیلیم آخی ،

بلكه ده من سنسیز اؤلموشم ائله ،

قبیر سیز، كفن سیز

اؤلموشم ائله ،

بلكه ده بیز اوندا آیریلماسایدیق ،

نه من ایندیكییدیم ،

نه سن ایندیكی 

آیریلدیق ، شیطانی گولدوردوك اوندا

بو ایلین ،

بو آیین ،

بو گونونده كی ،

ائله بو كوچه نین بو تینین ده كی ،

منی ده ، سنی ده اؤلدوردوك اوندا ،

ساغیمیز – سولوموز آداملا دولو ،

قول – قولا كیشیلر قادینلار كئچیر ،

اؤزوندن خبر سیز عؤمرونده مین یول ،

اؤزونو اؤلدورن آداملار كئچیر ،

كئچیر اؤز قانینا باتان آداملار ،

بیرده كی ، قان هانی ؟

قان آخی یوخدور...

هامی گوناهكاردی دونیادا ،

آمما

دونیادا هئچ كسین گوناهی یوخدو ! 

بیزسیز یازیلمیشدیر بو طالع ، بو باخت ،

ساپانددان آتیلان بیر جوت داشیق بیز ،

بلكه بو دونیادا اون – اون بئش ایل یوخ ،

مین ایل بوندان قاباق آیریلمیشیق بیز ،

حالال یولوموزو دیشیب ، نسه

چاشمیشیق بیر ئؤزگه یولدان گئتمیشیك ،

بلكه مین ایل قاباق سهو دوشوب نسه ،

مین ایللیك بیر سهوه قوربان گئتمیشیك ،

دیشیب یئرینی بلكه قیش ، باهار ،

قاریشیب دونیانین شهری كندی ،

بلكه اؤز بطنینده اؤگئی آنالار ،

اؤگئی بالالاری گزدیریر ایندی ،

عؤمروم باشدان – باشا یالاندی ،

طالعیم باشقایمیش دوغرودان ائله ،

او یولدان اؤتن قیز آنامدی بلكه ،

بلكه ده اوغلومدو بو اوغلان بلكه ،

بو یالان عؤمرومده گؤرن سن نه سن ؟

بلكه هئچ سئوگیلیم دئییلسن منیم ،

آنامسان ، باجیمسان ، نَِِنمسَن ، نسن ؟

بیرجه آلله بیلیر نَییمسن منیم  ...  

رامیز روشن 

آلا گوزلوم سندن آیری دوشلی

هجرانین غمیله كئف ائیله میشم

آه ، وای نان گونوم كئچیب دنیادا

درد آلیب غم ساتیب نفع ائیله میشم

سندن آیری شاد اولمورام گولمورم

جانیمدان بئزمیشم اؤله بیلمیرم

نه مدت دیر قوللوغونا گلمیرم

باغیشلا تقصیریم سهو ائیله میشم

حسرت قویما گوزو گوزه آماندی

یاندی باغریم دؤندؤ كؤزه آماندی

كئچن سوزو چكمه اؤزه آماندی

هزیان دانیشمیشام لاف ائیله میشم

(آشیق علسگر)

 بهانه سیز

گئتمك ایستییرسن بهانه سیز گئت

اویاتما مورگوللو خاطره لری

سسین همین سس دیر باخیشین اوگی

گئدیرسن سسینده یاد اولسون باری

سنه یالواریم می؟ بو ممكن دئیل

قویمارام قلبیم تك وقاریم سینا

آلچالیب یاشاماق عمر و گون دئیل

دئمیرم سن اوجا بیر داغسان اییل

دئمیرم علاجیم قالیبدیر سنه

نه سنده محبت قارا پول دئیل

نه من دیلنچیم ال آچیم سنه

گئتمك ایستییرسن او یول اودا سن

بیر جوت گوز باخاجاق دالینجا آنجاق

گئتدین می ؟بیر داها دونمك ایسته سن

تیكانلی یاستیغا دونه جك یئرین

گئتمك ایستیرسن نه دانیش نه دین

یوخ اول اوزاخلار تك دوماندا چنده

نه ییمی سئومیشدین دیه بیلمه دین

ایندیسه یوز عیب گورورسن منده

سنین گوزللیگین ای گول بوتون ملاحت دیر

بو حسن سنده كن ان بویوك سعادت دیر

رقیبه گوزلرینین مایل اولدوغون بیلیرم

من عارفم منه بیر اشاره كفایت دیر

حیف كی قیمتینی بیلمه دین گوزلیم

گوزل كی اوز قدرینی بیلمه دی جنایت دیر

دئییم كی گولمه ، دانیشما، رقیبه ناز ائتمه

نجه دئییم كی ، گولمك ، دانیشماق ، سنده بیر عادت دیر