گونشلی

دویموری چرخ فلك جور و جفادان چوخ شوكور
چكمیر ال مدتدی بیز بختی قارادن چوخ شوكور
الده توتموش بیر تیكه شور زیغ چؤره ك ظالیم فلك

قارشیلیق بیر یكه جان ایستیر گدادان چوخ شوكور

گون به گون آرتیر دیله نچی كوچه و بازارده

فوت اولور هر گون بیری قحط و غلادن چوخ شوكور
قئیقاناغی ، آشی ، سوتداشی ، لاواش ، كوفته نی
میل ائدیر دولتلیلر ، قورخور خدادن چوخ شوكور
هر مصیبت گلدی چكدیم جانیما .. كیمی
چیوریدیم غم غصه دندویدوم بلادن چوخ شوكور
قندیله چای ماتمینده آغلادوم دورت ایل تمام
گؤزلریم بی نور اولوب دوشدی ضیادن چوخ شوكور
ایندی ده نفتین عزاسین ساخلاماق لازیم گلیر
فارغ اولمور باشیمیز یبر گون عزادان چوخ شوكور
گاز ترقی ائتدی بوش قالدی فقیرین لامپاسی
بیر بو قالمیشدی اودا گئشدی قضادان چوخ شوكور
بو گئجه رویادا گؤردوم گون چیخیب بایرام اولوب
لوتلره پالتار یاغیر عرش علادن چوخ شوكور
ایلده بیر لو او یئییردی بینوا یوخسول پیلوو
اودا كوچ ائتدی بو ایل دار فنادن چوخ شوكور
قاضی الحاجاته یالوارسین گرك محتاج اولان
آز دگیل رحمی خدانون اغنیادن چوخ شوكور
چوخ دعالار ائیله دوخ او خالقین درگاهینه
اولمادی بیر منفعت حاصل دعادان چوخ شوكور
یولیله تعظیم ائدیب عرض ائیله دیم احوالیمی
سخت گؤردوم قلبینی شمر دغادن چوخ شوكور
آز قالیر دعوا بوگون دؤرد یاشینا قویسون قدم
بیر خبر یوخدور هله صلح و صفادن چوخ شوكور
معجزون احوالی چوخ سازدیر دئییرلر ، اصلی وار
جیبلری مملوو دور سیم و طلادن چوخ شوكور

معجز شبستری

حسن رخساریوی رؤیاده چكردیم قلمه

قلبیمی قاب ائلیوب قابه سالاردیم گئجه لر

بونا خاطیر كی آدین دوشمیه اغیار الینه

دوز كیمی آدینی یازدیقجا یالاردیم گئجه لر

بئله سیزلاردی اوره ك یادینه سالدیقجا سنی

قوش كیمی یئرده دوشه ردیم چابالاردیم گئجه لر

بلكه سن ساغ یاشییب ساغ دولانیب ساغ گزه سن

گؤزه لیم هر قادان اوْلسایدی آلاردیم گئجه لر

سن رقیبیمله گونوز سئیره چیخاردین چمنه

منده عشقینده سولاردیم سارالاردیم گئجه لر

گؤزلرین یادیمه دوشدوكجه اسه ردی بدنیم

سینه مه دیرناق آتاردیم یارالاردیم گئجه لر

تابلو اوستونده چكه ردیم سنی مین زحمتیلن

بیر باخیب اوستونه تئز رنگی جالاردیم گئجه لر

ایندی ده گئتمه لیسن گئت دئمیرم من ده گلیم

قاللام اوْل حالدا كی اوّلده قالاردیم گئجه لر

مكتب عشقیده مجنونیله من باهم ایدیم

غم ییغاردیم سینه مه غصه قالاردیم گئجه لر

مجنون اؤز عشقینی لیلایه گؤره بیلدیردی

من گونوز یازدیقیم عشقی قارالاردیم گئجه لر

هوشنگ جعفری

گؤزلر آسیلی, یوخ نه قارالتی, نه ده بیر سس
باتمیش قولاغیم گؤر نه دوشورمكده دی داری

بایقوش آییغام سؤیله یه رك گاهدان اییلده ر
گاهدان اونو دا یئل دئیه لای لای, هوش آپاری

یاتمیش هامی, بیر آللاه اویاقدیر داها بیر من
مندن آشاغی كیمسه یوخ, اوندان دا یوخاری

قورخوم بودو یار گلمه یه, بیردن یاریلا صوبح
باغریم یاریلار, صوبحوم آچیلما! سنی تاری

 دان اولدوزو ایسته ر چیخا, گؤز یالواری چیخما
او چیخماسا دا اولدوزومون یوخدو چیخاری

گلمه ز, تانیرام بختیمی, ایندی آغارار صوبح
قاش بؤیله آغاردیقجا, داها باش دا آغاری

عئشق’ین كی قراریندا وفا اولمایاجاقمیش
بیلمه م كی طبیعت نییه قویموش بو قراری

سانكی خوروزون سون بانی خنجردی سوخولدو
سینه مده اوره ك وارسا كسیب قیردی داماری

ریشخندله قیرجاندی سحر سؤیله دی: دورما
جان قورخوسو وار عئشقین, اوتوزدون بو قوماری

اولدوم قارا گون آیریلالی او ساری تئلدن
بونجا قارا گونلردی ائده ن رنگیمی ساری

گؤز یاشلاری هر یئردن آخارسا منی توشلار
دریایا باخار, بللیدی چایلارین آخاری

از بس منی یاپراق كیمی هیجرانلا سارالدیب
باخسان اوزونه سانكی قیزیل گولدو, قیزاری

مئحراب-ی شفقده اؤزومو سجده ده گؤردوم
قان ایچره غمیم یوخ, اوزوم اولسون سنه ساری

عئشقی واریدی شهرییار’ین گوللو چیچكلی
افسوس قارا یئل اسدی, خزان اولدو باهاری

نه چیچك وئرمه یه بیر كسیمیز وار

نه بیر كیمسه میز وار چیچك اومماغا ...

 

درسم گول لرینی بو گلن یازین

ساللانیب یئلله نسم بوداق لاریندان

ائشیتسم آدیمی سئون بیر قیزین

هله اؤپولمه میش دوداق لاریندان

بو یاز گیجه سینده اؤلمه یه نه وار؟!

شاعیر: رامیز روشن

آرادان نه قدر ایل كئچیب گؤرن

تانییا بیلمدیم ، منی باغیشلا،

من ائله بیلیردیم ، سنسیز اؤله رم ،

من سنسیز اؤلمه دیم ، منی باغیشلا !

 

« اؤلمه دیم » دییرم ، نه بیلیم آخی ،

بلكه ده من سنسیز اؤلموشم ائله ،

قبیر سیز، كفن سیز

اؤلموشم ائله ،

بلكه ده بیز اوندا آیریلماسایدیق ،

نه من ایندیكییدیم ،

نه سن ایندیكی 

آیریلدیق ، شیطانی گولدوردوك اوندا

بو ایلین ،

بو آیین ،

بو گونونده كی ،

ائله بو كوچه نین بو تینین ده كی ،

منی ده ، سنی ده اؤلدوردوك اوندا ،

 

ساغیمیز – سولوموز آداملا دولو ،

قول – قولا كیشیلر قادینلار كئچیر ،

اؤزوندن خبر سیز عؤمرونده مین یول ،

اؤزونو اؤلدورن آداملار كئچیر ،

كئچیر اؤز قانینا باتان آداملار ،

بیرده كی ، قان هانی ؟

قان آخی یوخدور...

هامی گوناهكاردی دونیادا ،

آمما

دونیادا هئچ كسین گوناهی یوخدو ! 

 

بیزسیز یازیلمیشدیر بو طالع ، بو باخت ،

ساپانددان آتیلان بیر جوت داشیق بیز ،

بلكه بو دونیادا اون – اون بئش ایل یوخ ،

مین ایل بوندان قاباق آیریلمیشیق بیز ،

 

حالال یولوموزو دیشیب ، نسه

چاشمیشیق بیر ئؤزگه یولدان گئتمیشیك ،

بلكه مین ایل قاباق سهو دوشوب نسه ،

مین ایللیك بیر سهوه قوربان گئتمیشیك ،

 

دیشیب یئرینی بلكه قیش ، باهار ،

قاریشیب دونیانین شهری كندی ،

بلكه اؤز بطنینده اؤگئی آنالار ،

اؤگئی بالالاری گزدیریر ایندی ،

 

عؤمروم باشدان – باشا یالاندی ،

طالعیم باشقایمیش دوغرودان ائله ،

او یولدان اؤتن قیز آنامدی بلكه ،

بلكه ده اوغلومدو بو اوغلان بلكه ،

 

بو یالان عؤمرومده گؤرن سن نه سن ؟

بلكه هئچ سئوگیلیم دئییلسن منیم ،

آنامسان ، باجیمسان ، نَِِنمسَن ، نسن ؟

بیرجه آلله بیلیر نَییمسن منیم  ...  

رامیز روشن