گونشلی

آلا گوزلوم سندن آیری دوشلی

هجرانین غمیله كئف ائیله میشم

آه ، وای نان گونوم كئچیب دنیادا

درد آلیب غم ساتیب نفع ائیله میشم

سندن آیری شاد اولمورام گولمورم

جانیمدان بئزمیشم اؤله بیلمیرم

نه مدت دیر قوللوغونا گلمیرم

باغیشلا تقصیریم سهو ائیله میشم

حسرت قویما گوزو گوزه آماندی

یاندی باغریم دؤندؤ كؤزه آماندی

كئچن سوزو چكمه اؤزه آماندی

هزیان دانیشمیشام لاف ائیله میشم

(آشیق علسگر)

 بهانه سیز

گئتمك ایستییرسن بهانه سیز گئت

اویاتما مورگوللو خاطره لری

سسین همین سس دیر باخیشین اوگی

گئدیرسن سسینده یاد اولسون باری

سنه یالواریم می؟ بو ممكن دئیل

قویمارام قلبیم تك وقاریم سینا

آلچالیب یاشاماق عمر و گون دئیل

دئمیرم سن اوجا بیر داغسان اییل

دئمیرم علاجیم قالیبدیر سنه

نه سنده محبت قارا پول دئیل

نه من دیلنچیم ال آچیم سنه

گئتمك ایستییرسن او یول اودا سن

بیر جوت گوز باخاجاق دالینجا آنجاق

گئتدین می ؟بیر داها دونمك ایسته سن

تیكانلی یاستیغا دونه جك یئرین

گئتمك ایستیرسن نه دانیش نه دین

یوخ اول اوزاخلار تك دوماندا چنده

نه ییمی سئومیشدین دیه بیلمه دین

ایندیسه یوز عیب گورورسن منده

سنین گوزللیگین ای گول بوتون ملاحت دیر

بو حسن سنده كن ان بویوك سعادت دیر

رقیبه گوزلرینین مایل اولدوغون بیلیرم

من عارفم منه بیر اشاره كفایت دیر

حیف كی قیمتینی بیلمه دین گوزلیم

گوزل كی اوز قدرینی بیلمه دی جنایت دیر

دئییم كی گولمه ، دانیشما، رقیبه ناز ائتمه

نجه دئییم كی ، گولمك ، دانیشماق ، سنده بیر عادت دیر

گرك هر بیر گوزله بیر دانا چركین ده یارانسین

بیری انسین یئره گوكدن بیری عرشه اوجالانسین

بیری چالسین ال آیاق غم دنیزینده

بیری ساحل ده سئوینچ ایله دایانسین

بیری ذلت پالازین باشه چكیب یاتسادا آنجاق

بیرینین بختی اویانسین

بیری قویلانسادا نعمت لره یئرسیز

بیری ده قانه بویانسین

عاصم اردبیلی

قالارقی یاشاییش

مگر من اؤله جه گم كی ، آرزولاریم بادا گئتسین

                    مگر بوردان گئده جه گم ،  منیم آدیم یادا گئتسین

نه گؤل اؤلر نه ده دیلك ، خزانا سن باخما بئله

                    دنیا غصه سینی یئمه ، اؤزؤن اودا یاخما بئله

گؤرؤرسن یارپاق سارالیر دؤشؤر یئره تكه اولور

                    گؤردوگون او گؤزل باهار پاییزدا سارالیر سولور

بو خزانین دالیسیندا بیر قالارقی باهار واردی

                    او دنیا گئنیش بیر یئردی آما بو دنیا چوخ داردی

ایتگین اولمیاجاق انسان بلكه قالارقی قالاجاق

                    بوتون اولان لذت لری،  بیر گون جانینا آلاجاق

نیه گرك خیردا اولاق ، بیزه یاراشار یكه لیق

                    بیز عشقدن دویانماریق مگر سودان دویار بالیق

پاریلدین گونش كیمی گرك هر یئره نور ساچاق

                    نه اینكی ظلمته گئدك ایشیقلیقدان قویاق قاچاق

اینان ایسته دیكلریمیز بیر گؤن یئرینه یئته جك

                    روزگار ووران یارالاردا بیلكی بیر زمان بیته جك

( آیدین)